Dihay usa ka kabos nga pamilya. Sa ilang kakabos, naningkamot ang matag sakop sa pamilya. Nagbaligya og uling ang inahan nga si Manang Auring ug nag-kargador sa piyer ang amahan nga si Manong Kardo. Tulo ang ilang anak. Si Ate Aya ug si Kuya Gido nagtungha sa kolehiyo sa dakbayan. Kon wa silay klase, nagtrabaho sila sa karenderiya sa ilang iyaan ug uyoan aron dunay ikapuno sa ilang ‘allowance’ sa tunghaan. Si Emil ang kinamanghuran. Siya usa ka batang hubakon. Matod pa sa iyang ginikanan, sinunod o kabilin kuno sa iyang apuhan ang iyang sakit nga hubak. Tungod sa kawad-on maglisod pagpatambal kaniya ang iyang ginikanan sa ospital sa higayong motukar ang iyang hubak.
