Erat autem Ionathae filio Saul filius debilis pedibus: quinquennis enim fuit, quando venit nuncius de Saul et Ionatha ex Iezrahel. tollens itaque eum nutrix sua, fugit: cumq. festinaret vt fugeret, cecidit, et claudus effectus est: habuitq. vocabulum Miphiboseth.
ibidem, II Reg. 9:6–13 (pages 263–264):
Cum autem venisset Miphiboseth filius Ionathae filii Saul ad Dauid, corruit in faciem suam, et adorauit. Dixitq. Dauid: Miphiboseth? Qui respondit: Adsum seruus tuus. Et ait ei Dauid: Ne timeas, quia faciens faciam in te misericordiam propter Ionathan patrem tuum, et restituam tibi omnes agros Saul patris tui, et tu comedes panem in mensa mea semper. Qui adorans eum, dixit: Quis ego sum seruus tuus, quoniam respexisti super canem mortuum similem mei? Vocauit itaque rex sibam puerum Saul, et dixit ei: Omnia quaecumque fuerunt saul, et vniuersam domum eius, dedi filio domini tui. Operare igitur ei terram tu, et filii tui, et serui tui: et inferes filio domini tui cibos vt alatur: Miphiboseth autem filius domini tui comedet semper panem super mensam meam. Erant autem sibae quindecim filii, et viginti serui. Dixitq. siba ad regem: sicut iussisti domine mi rex seruo tuo, sic faciet seruus tuus: et Miphiboseth comedet super mensam meam, quasi vnus de filiis regis. Habebat autem Miphiboseth filium paruulum nomine Micha: omnis vero cognatio domus Sibae seruiebat Miphiboseth. Porro Miphiboseth habitabat in Ierusalem: quia de mensa regis iugiter vescebatur: et erat claudus vtroque pede.
ibidem, II Reg. 16:1–4 (page 271/1):
Cumq. Dauid transisset paululum montis verticem, apparuit Siba puer Miphiboseth in occursum eius, cum duobus asinis, qui onerati erant ducentis panibus, et centum alligaturis vuae passae, et centum massis palatharum, et vtre vini. Et dixit rex Sibae. Quid sibi volunt haec? Responditq. Siba: Asini, domesticis regis vt sedeant: panes et palathae ad vescendum pueris tuis: vinum autem vt bibat siquis defecerit in deserto. Et ait rex: Vbi est filius domini tui? Responditq. Siba regi: Remansit in Ierusalem, dicens: Hodie restituet mihi domus Israël regnum patris mei. Et ait rex Sibae: Tua sint omnia quae fuerunt Miphiboseth. Dixitq. Siba: Oro vt inueniam gratiam coram te, domine mi rex.
ibidem, II Reg. 19:24–30 (page 275):
Miphiboseth quoque filius Saul descendit in occursum regis illotis pedibus, et intonsa barba: vestesq. suas non lauerat a die qua egressus fuerat rex, vsque ad diem reuersionis eius in pace. Cumq. Ierusalem occurrisset regi, dixit ei rex: Quare non venisti mecum Miphiboseth? Et respondens ait: Domine mi rex, seruus meus contempsit me: dixiq. ei ego famulus tuus vt sterneret mihi asinum, et ascendens abirem cum rege: claudus enim sum seruus tuus. Insuper et accusauit me seruum tuum ad te dominum meum regem: tu autem domine mi rex, sicut angelus Dei es, fac quod placitum est tibi. Neque enim fuit domus patris mei, nisi morti obnoxia domino meo regi: tu autem posuisti me seruum tuum inter conuiuas mensae tuae: quid ergo habeo iustae querelae? aut quid possum vltra vociferari ad regem. Ait ergo ei rex: Quid vltra loqueris? fixum est quod locutus sum: tu, et siba diuidite possessiones. Responditq. Miphiboseth regi: Etiam cuncta accipiat, postquam reuersus est dominus meus rex pacifice in domum suam.
ibidem, II Reg. 21:7–9 (page 277):
Pepercitq. rex Miphiboseth filio Ionathae filii Saul, propter iusiurandum Domini, quod fuerat inter Dauid et inter Ionathan filium Saul. Tulit itaque rex duos filios Respha filiae Aia, quos peperit Sauli, Armoni, et Miphiboseth: et quinque filios Michol filiae Saul, quos genuerat Hadrieli filio Berzellai, qui fuit de Molathi, et dedit eos in manus Gabaonitarum: qui crucifixerunt eos in monte coram Domino: et ceciderunt hi septem simul occisi in diebus messis primis, incipiente messione hordei.