User:Aearthrise/Pennsylvania Dutch/Die Muttersproch
Die Inauguration.
editMister Drucker:
Well, now hen amole widder de Dumma grutta- ich maen de Demakrata- ihr aegner President, un ich will en henz wetta sie sin froh, for es is now sechtsae yohr sidder sie aen g'hat hen. Do am letshta Dinshdag hen sie der Woodrow (Woodrow maend "Holz roy") Wilson is amt fun President gadu un se hen en groste tseit g'hat in Washington. Es wahra fiel dousend leit do un sie hen gagrisha un gehurrahed so as mer shier-gar nix haera kut kenna, ovver wie de tzeid kumma is for der Mister Wislon sei aed nemma war alles so shtill dos mer en baum het kenna haera folla. Der Chief Justice White hut es aed gevva, un der President Wilson hut g'shwora os er die Constitution fun der United Shtates erholda daet un daet sei pflichta du as President so gut os er kent un so weit os er wist. Der President Taft un der President-elect Wilson sin mitnonner g'fahra fum Weisa House bis tsum Capitol, un sie hen alla beita gagucked os wan sie gut tsufritta waera- aener dos er des ampt hut un der anner dos er frei is un brauch sich nimmy bottera mit da Congressmenner, Mexico, die trusts un so socha.
So kshwint os der Wilson eikshwora war, un hut g'sawt "I will," don war er President fun da United Shtates, d'no hut er gleich sei Inaugural Address obglaesa, un dnu is ehr un der "ex"-Bresident Taft widder tsrick ans Weis House g'fohra mitnonner, un die band hut g'shpieled un die leit hen gagrisha wie wietich. Now wella mer mohl saena wie der Wilson sich bahaefed, un eb er de trusts un de corporations sich behaefa macht. Ovver ich denk er hut mae obgabissa os er kowa kan; ovver mer wella hoffa os er sie ivver sei knie biegt un gebt iena iehra hussa foll, so os sie brilla un fershprecha sich tsu behaefa. Won er des duht don is er en gutter kaerl. Ich un de mam hen oft g'wunnert wie es haer gaet an aens fun denna inaugurations, un wos sie duna, so hen mer g'saht mer wella aw in Washington gae, un mer hen grosa tseida g'hat uns ready macha. Die Mam hut sich mier en nei hem g'maacht un mer wara yusht about ready for ap tsu shtaerta, wie mer in der tseiding glaesa hen dos about a million, mae oder wennicher, weibsleit os sich Suffragists haesa uf em waeg waera, un daeta laufa der gons waeg noch Washington. D'no hut de Mam g'saht, "Yetz bleiva mer dahaem; Ich hab ganunk Woman's Sufferings do, un brauch net in Washington gae don saga sie ich bin aw aens fun denna Suffragists, un net for em President sei ampt daet ich so g'haesa werra." D'no sin mer derhaem gabliva un hen unser graut un tomato blanza g'saet.
Hussasock.
The Pennsylvania-German and the Infidel
editDehl Leut wu en wenig hart dumm sin heese die Pennsylvanisch Deutsche Leut just die Dum Dutch. Es is wohr, Dehl vun unsere Leut sin net so schmaert wie sie sei sette, awer Jedermann, wu sie kennt, mus zugewe, dass sie about so viel commoner verstand hen wie ehnig Epper sunst. Do is en Fall, der sell deutlich beweist.
En Pennsylvanisch Deutscher is bekannt gemacht worre mit eme Infidel. En Infidel is en Unglaubiger, un noch der Biewel is en Unglaubiger en Narr. Der Infidel hot geprahlt, dass er nix glaawe daet, exsept was er versteh daet, awer desmohl hot er meh wie sei Match katt. Der Pennsylvanier sagt: "Ich glaab die biewel; was glaabst du?"
Der Infidel antwortet: "Ich glaab just was ich versteh kann." 'S Gespraech war nau so:
Pennsylvanier: "So! Loss uns emol sehne. Der anner Dag hab ich en Hund uf der Stross ahgedroffe, dem sei ehnt Ohr hot ufgestanne un's anner hot nunner g'kanke. Wie kummt sell?"
Infidal: "Ich kann's net sage."
Pennsylvanier: "All recht. Ich denk, du bist net ganz so schmaaert wie du gemeent host. Noch Eppes. Letz Summer bin ich am John Schmitt seim Kleefeld vorbei geritte. An ehm Platz war en Trupp Seu im Klee, un uf ihre Bueckel sin Berste gewachse. An ehm annere Platz war en Heerd Schoof, un uf ihre Bueckel is Woll gewachse. Kannst du mer sage, wie es kummt dass der Klee Berste uf de Seu un Woll uf de Schoof gebrocht hot?"
Infidel: "Nee, sell kan ich net versteh."
Pennsylvanier: "Du sagst, du kannst net versteh, un doher glaabst du's ah net. Ich kann's ah net versteh, awer ich glaab's doch, weil's so is. Nau noch eh Frog. Glaabst du, dass en Gott is?"
Infidel: "Nee, ich glaab ken so Nonsens."
Pennsylvanier: "Ich denk wohl net. Die Fakt is, du bist net halwer so shmaert wie du gemehnt host. Ich bin froh, dass ich dich gesehna hab. Ich kenn dich net, awer ich hab vun deine Brueder in der Biewel gelese."
Infidel: "Wu host du vun meine Brueder in der Biewel gelese? Sell glaab ich ah net."
Pennsylvanier: "Ei, im 14te Psalm heest es: 'Die Narre sage in ihrem Herz, es gebt ken Gott.' Sie sin en wenig schmaerter wie du. Sie behalte es im Herze, awer du plapperst es grad raus. Good Bye."
Do is nooch en kleene Story vun der sehme Art. En Quaeker hot en Infidel ahgedroffe. Der Infidel hot behaapt, er daet nix glaawe exsept was er sehnt. Der Quaeker hot ihn gefrogt: "Host du schu dei Hern un dei Seel g'sehne?" Die antwort war ufkohrs "Nee." Der Quaeker hot nau gesaht: "Du sagst du glaabst just was du sehnst, un doher glaabst du net, dass du en Hern host, un ich denk viel anner Leut glaawe's Naemlich in dere Sach."
D.M.