User:Widsith/Dream of the Rood
The Dream of the Rood edit
- Hƿæt, ic sƿefna cyst, secᵹan ƿylle,
- hƿæt me ᵹemætte to midre nihte,
- syðþan reordberend reste ƿunedon.
- Þuhte me þæt ic ᵹesaƿe syllicre treoƿ
- on lyft lædan leohte beƿunden, [5]
- beama beorhtost. Eall þæt beacen ƿæs
- beᵹoten mid ᵹolde; ᵹimmas stodon
- fæᵹere æt foldan sceatum, sƿylce þær fife ƿæron
- uppe on þam eaxlᵹespanne. Beheoldon þær enᵹel dryhtnes ealle,
- fæᵹere þurh forðᵹesceaft; ne ƿæs ðær huru fracodes ᵹealᵹa. [10]
- Ac hine þær beheoldon haliᵹe ᵹastas,
- men ofer moldan, ⁊ eall þeos mære ᵹesceaft.
- Syllic ƿæs se siᵹebeam, ⁊ ic synnum fah,
- forƿunded mid ƿommum. Geseah ic ƿuldres treoƿ
- ƿædum ᵹeƿeorðod ƿynnum scinan, [15]
- ᵹeᵹyred mid ᵹolde; ᵹimmas hæfdon
- beƿriᵹen ƿeorðlice Ƿealdenes treoƿ.
- Hƿæðre ic þurh þæt ᵹold onᵹytan meahte
- earmra ærᵹeƿin, þæt hit ærest onᵹan
- sƿætan on þa sƿiðran healfe. Eall ic þæs mid sorᵹum ᵹedrefed. [20]
- Forht ic þæs for þære fæᵹran ᵹesyhðe. Geseah ic þæt fuse beacen
- ƿendan ƿædan ⁊ bleom: hƿilum hit ƿæs mid ƿætan bestemed,
- besƿyled mid sƿates ᵹanᵹe, Hƿilum mid since ᵹeᵹyrƿed.
- Hƿæðre ic þær licᵹende lanᵹe hƿile
- beheold hreoƿceariᵹ Hælendes treoƿ, [25]
- oððæt ic ᵹehyrde þæt hit hleoðrode;
- onᵹan þa ƿord sprecan ƿudu selesta:
- “Þæt ƿæs ᵹeara iu— ic þæt ᵹyta ᵹeman—
- þæt ic ƿæs aheaƿen holtes on ende,
- astyred of stefne minum. Genaman me ðær stranᵹe feondas. [30]
- Geƿorhton him þær to ƿæfersyne, heton me heora ƿerᵹas hebban.
- Bæron me ðær beornas on eaxlum, oððæt hie me on beorᵹ asetton,
- ᵹefæstnodon me þær feondas ᵹenoᵹe. Geseah ic þa Frean mancynnes
- efstan elne mycle þæt he me ƿolde on ᵹestiᵹan.
- Þær ic þa ne dorste ofer Dryhtnes ƿord [35]
- buᵹan oððe berstan, þa ic bifian ᵹeseah
- eorðan sceatas. Ealle ic mihte
- feondas ᵹefyllan, hƿæðre ic fæste stod.
- Onᵹyrede hine þa ᵹeonᵹ Hæleð (þæt ƿæs God ælmihtiᵹ),
- stranᵹ ⁊ stiðmod. Gestah he on ᵹealᵹan heanne, [40]
- modiᵹ on maniᵹra ᵹesyhðe, þa he ƿolde mancyn lysan.
- Bifode ic þa me se Beorn ymbclypte; ne dorste ic hƿæðre buᵹan to eorðan,
- feallan to foldan sceatum. Ac ic sceolde fæste standan.
- Rod ƿæs ic aræred; ahof ic ricne Cyninᵹ,
- heofona Hlaford; hyldan me ne dorste. [45]